Adat Budaya Batak Mamungka Tujung

Adat Budaya Batak, Songonon ma pangulahon na:  

1. Parjolo mambungka tujung-Nuaeng hubungka ma tujung on anggiat ma bungka  panggabean parhorasan tu ho boru/ito/lae tumpahon ni Amanta Debata.  2. Manuapi-Husuapi ma ho boru/ito/lae, ias ma ilu sian simalolongmu. Angka silas ni  roha ma dipasahat Tuhanta di ho boru/ito/lae dohot di hita saluhutna tu joloan ni ari  on (huhut disuapi tolu hali)  

3. Mangalehon mangan-mangan ma indahan dohot dengke on asa margogo ho mangula  ulaonmu asa boi parmudu-muduon mu anakhonmi (huhut disulangkon 3 hali)  4. Painumhon-inum ma mual sitiotio on asa anggiat ma tio angka pansamotan tumpahan  ni Amanta Debata di borungku/ibotongku/laengku nang di hita saluhutna (huhut  dipainumhon 3 hali)  

5. Pasahat parbue gabe-pir ma tondim pir sahalam mangiringiring sude pomparanmi  donganmu sarimatua (huhut di jomput jala dibahen disimajujung ni namabalu).  Dung sidung didok hatana, disaburhon ma parbue i tolu hali tu ginjang ni nahundul  disi huhut didok, Horas… Horas…  

 Horas…  

 Ditingki namamungka tujung, tongtong do hula-hula pasahat dengke tu pamoruonna.  Molo namabalu i ndang dope marpahompu, pamoruon paradehon juhut rambingan  patuduhon na dangol situtu do namasa i. Molo tung pe namarhosa diseat tong do  disangsang i sude sopola adong namargoarna. Di ulaon matipul ulu/matompas tataring  ndang masa marbagi jambar. Molo nunga marpahompu namabalu i (nunga adong silas ni  roha), pamoruon paradehon juhut dohot namargoar na, tudu-tudu nisipanganon on jotjot  do dipeakhon di tonga-tonga ni adopan sian pangidoan ni hulahula asa sude nampunasa.  

Dung sidung i sude diulahon, marsipanganon ma, nama mamboan tangiang mangan  pamoruon do. Andorang so dipungka dope mandok hata, jolo dibagi ma parjambaran  (tudutudu ni sipanganon) jala marpanungkun do tu hulahula boha parturena. Hulahula  mangalusi, “Bagi hamu ma songon dia na masa di hutamuna on”. Dibagi pamoruon ma  jala dipasahat hombar tu angka inganan na. Dung singkop sude parpeak ni jambar diuduti  ma tu namandok hata togar-togar sian horong hulahula.  

 Molo dung marpahompu namabalu, pasahaton do pisopiso tu hulahula dohot horong  tulang, tu namangudurhon (naginonghon) pe lehonon do pasi tuak na tonggi andorang so  mangampu dope. Di tingki mamungka tujung dang dohot namabalu mangampu. Dung  sidung diampu hasuhuton, dipasahat ma muse tu hulahula asa ditutup dohot  ende/tangiang.  

Dung i, marhehe na uli ma. Dung hira-hira 3-7 ari ro do muse hulahula, dongan tubu,  boru, bere dohot dongan sahuta manogar-nogari. Di ulaon manogari on namabalu nunga  dohot mangampu hata. Tong do di ulaon manogar-nogari pe hulahula ma na manutup  dohot tangiang.