Adat Budaya Batak Sanggul Marata (Sijagaron) Khusus Natua-tua (Mauli Bulung)

Adat Budaya Batak, Natuatua ma digoari molo dung adong pahompu, marnini marnono tarlumobi  marondoh-ondoh. Molo marujung jala nunga adong pahompu alai adong dope ianakhonna  na so hot ripe digoari ma on “natuatua sarimatua”. Molo marujung jala nunga sude hot  ripe ianahonna jala marpahompu digoari ma on “natua-tua saurmatua”. Molo marujung  jala nunga hot ripe sude ianahonna, marpahompu jala marnini marnono sahat tu na  marondoh-ondoh digoari ma on “natua-tua maulibulung”. 

 Molo natuatua marujung dibahen do sijagaron (sanggul marata) di halang ulu ni  namonding patandahon hatuaonna. Sian parpeak ni sijagaron i boi do botoon ni natorop  partording ni hatuaon ni namonding i, jala tingki na laho mandok hata pe nunga botoon  ni natorop dia sidohononna. Ia sijagaron ima ampang na marisi :  

1.Eme  

2.Dangka ni hariara/baringin  

3. Sanggar  

4. Ompu-ompu  

Marlapatan do parpeak ni sijagaron on di halangulu ni namonding:  

1. Molo dipeakhon di halangulu siamun ni na monding lapatanna, pahompu  sian anak adong.  

2. Molo dipeakhon di halangulu hambirang ni na monding lapatanna,   pahompu sian boru adong.  

3. Molo dipeakhon di halangulu tongatonga ni na monding lapatanna,   pahompu sian anak dohot boru adong.  

4. Molo adong nini/nono, ditambai ma muse di ginjang ni sijagaron i sada   ampang na metmet marisi Eme, Gambiri dohot Pira ni manuk.  

5. Molo sahat tu na morondoh-ondoh, ditambai ma muse parindahanan na   metmet marisi itak jala dipekhon ma i tu ginjang ni ampang na metmet   parginjang ni sijagaron i.  

Parhundul ni pomparan ni na monding i pe marlapatan do:  

1. Sude anak dohot angka gomparan na hundul di siamun mangadopi na   monding. 

2. Sude boru dohot angka gomparanna hundul di hambirang mangadopi na   monding.  

Andorang so dipatuat tu alaman, jolo adong do acara di jabu jala di uduti tu mardondontua.  Parumaen siangkangan ma na manghunti sijagaron i huhut manghaliangi bangke i tolu  manang lima hali. (Laos mangendehon ende Buku Ende no. 119: Martua do dohonon).  Molo holan pahompu sian boru do adong, dang pola diulahon mardondontua, na manghunti sijagaron boru suhut do ala sian boru na i do adong pahompuna jala laos i do  umbahen na adong sijagaron. Di na laho tuat tu alaman, parjolo ma sijagaron tuat dung i  dipatuat ma bangke i, dung i pe asa ulaon di alaman.  

Nuaeng on mardondontua tong dope diulahon alai andorang so sahat dope tu acara huria,  dang diulahon be i dung sidung acara huria, ai acara huria i nama na mangujungi ulaon i  (manutup batang, sahat tu udean).  

Lapatan ni angka suan-suanan na binahen tu sijagaron  

1. Eme : Eme sitambatua ma parlinggoman ni siborok Dilehon Amanta Debata ma di hita  horas-horas huhut diparorot (Mangido tu Amanta Debata anggiat sude pomparan  mandapot tua/rejeki huhut hipas-hipas).  

2. Hariara : Tubu hariara di holangholang ni huta Tubu ma dihita anak namarsangap  dohot boru namartua (Mangido tu Amanta Debata asa dilehon pinompar na  marhapistaran dohot na marbisuk)  

3. Baringin : Hau baringin ima sada hau na bolon na boi pangunsandean dohot  parlinggoman, jala tung mansai godang do pidong marasar/ maringanan/ mangolu di  rantingna. (Mangido tu Amanta Debata asa pinomparna na boi gabe pangalualuan,  berhasil) 

4. Sanggar : Tu sanggar ma amporik Tu lubang ma satua Sinur na pinahan gabe na niula  (Mangido tu Amanta Debata asa ulaon ni angka pinomparna berhasil jala dipadao  angka harugian)  

5. Ompu-ompu : On ma raja ni duhut-duhut di halak Batak, mangido tu Amanta Debata  asa dilehon habisuhon dohot hapistaran tu angka pomparan na.  

6. Gambiri : Gambiri simiakmiak Mangido tu Amanta Debata asa dimiahi (dipasupasu)  sude ulaon ni angka pomparan na.  

7. Litak : Manang itak gurgur. Mangido tu Amanta Debata asa dilehon sinadongan di  pomparan na.  

8. Pira ni manuk : Mangidohon hagabeon jala torop pomparan na.  

 Molo pinarrohahon, lapatan ni angka suan-suanan na adong di sijagaron on,  patuduhon na apala ringkot di halak Batak ima pinompar na berhasil (na boi  pangunsandean). Tarida do i sian palsafah ni halak Batak ima: Hagabeon, Hamoraon  Hasangapon. Ulaon sisongonon dang pola gadang dipamasa molo di samosir ya tung  adong pe sipata diangka ulaon disongonon na mangihut hasuhuton na ro sian luat na asing  gabe maringan di samosir.