Adat Budaya Batak Mangungkap/Mambungka Hombung

Adat Budaya Batak, Secara adat Batak Toba, jika ada orang tua yang meninggal dunia, tentunya keluarga  yang ditinggalkan mendapatkan banyak warisan yang ditinggal alamarhum, oleh karena  pihak hula-hula atau tulang untuk memastikannya secara adat dilaksanakan  pemberitahuan warisan apa saja yang ditinggalkan almarhum, dan waktu yang sama ada  kewajiban keluarga yang ditinggalkan memberikan secukupnya atau sejumlah uang  kepada pihak hula-hula atau tulang dari almarhum sebagai ucapan terima kasih keluarga  atas partisipasi selama upacara persiapan pemakaman berlangsung, atau paling tidak  pihak hula-hula dan tulang sudah memberikan ulos seperlunya kepada keluarga yang  ditinggalkan.  

 Hombung ima sada inganan napinatupa sian hau, ala najolo ndang adong dope  lamari, jadi hombung on inganan ni angka arta songon sibong, cicin dohot angka na asing  di halak Batak. Tingki saonarion nunga tung mansai maol luluan hombung di halak Batak,  holan lamari nama na adong. Nang pe songon i, di paradaton tong dope dipangke goar i,  ima mangungkap hombung. Molo matua sada natuatua, jala ibana nama naparpudi sian  parsaripeonna, sude ianakhonna nunga hot ripe, diulahonma mangunghap hombung.  Paraman (amang naposo)/tulang naposo ni namonding i do na berhak mangunghap  hombung i sian horong ni hula-hula. Tujuan ni mangunghap hombung ima na laho  mambuat tanda mata/kenang-kenangan sian sebagian arta na tininggalhon ni natuatua i.  Molo nuaeng on ganti ni tanda mata i dipatupa ma hepeng, alai tong do goarna  mangunghap hombung.  

 Pangulahon na: Dung mulak sian udean, angka dongan tubu, boru, dongan sahuta  nang horong ni hulahula dohot sude tulang, bonaniari digonghon do tu jabu pasahat hata  togar-togar. Parjolo ma marsipanganon, dung i pasahat hata togartogar ma bonaniari,  tulang dohot hula-hula. Andorang si diampu, jolo pasahaton do pisopiso tu sude horong  ni hulahula, tulang, bonaniari jala pasahaton ma muse pasi tuak natonggi tu uduran nasida.  Dung sidung on sude dipasahat, diulahon ma mangunghap hombung. Paraman (amang  naposo)/tulang naposo ni namonding i, mandok: “Najolo hupasahat hami do pauseang  ulos na soraburuk (hauma) tu amangboru dohot angka sibong (anting-anting) tu  namborunami. Mangihuthon barita dohot pamerengan nami namalo mansari do  amangboru/namboru on, sinur pinahan na, gabe naniula na. Tontu nunga godang arta  disimpan nasida, jadi mardomu tusi naeng do adong di hami tanda mata”. Mangalusi ma  pinompar ni namonding i: “Nauli rajanami”. Laos dipasahatma bentuk hepeng/barang.  Dung i mangampu ma dongan sahuta, boru, dongan tubu dohot hasuhuton. Dipasahat ma  tu hulahula laho manutup dohot ende/tangiang.  

Pangarapoton  

 Molo monding sada natunggane/natuatua, dipatupa do pangarapoton laho mangido  paniroion sian dongan tubu, boru, dongan sahuta, hulahula dohot tulang. Parjolo do  marsipanganon asa manghatai alai ndang adong parjambaran. Di ulaon sisongonon ndang  pola sai ingkon marsipanganon lumobi molo ndang dope marpahompu. Jala muse angka  na ro tu pangarapoton i nunga jolo mangan sian bagasna alai olo do sipata hasuhuton  manggokhon asa jolo marsipanganon.  

 Sidung marsipanganon jala denggan hundul sude napinaraja, hasuhuton mangido  panuturion taringot tu napasahat saput, tujung dohot angka na asing, jala angka dia ma  sipatupaon (nunga marpahompu manang ndang dope). Hasuhuton patolhashon ari  partuatna tu angka raja. Jadi dung adong pangarapoton, marbinoto ma angka raja, hulahula dohot sude tulang laho mangatur tingkina songon i nang angka na manghobasi pe. Sidung  pangarapoton diujungi hula-hula ma dohot ende/tangiang.  

Najolo, molo dung marpahompu na monding, asing-asing do parjuhut dipangarapoton tu  parjuhut di partuatna jala asing do nang arina (najolo lima sahat tu sia ari asa diboan tu  udean namonding i, lam leleng ba lam tarida ma sinadongan ni pomparanna). Molo  dipangarapoton juhutna namarmiakmiak, ba dipartuatna (diparihutna) lombu sitio ma  juhutna. Molo lombu sitiosoara parjuhutna di pangarapoton, gaja toba (horbo ±400kg) ma  dipartuatna (diparihutna).  

 Molo gaja toba (horbo) parihutna, dibagihon (didabuhon) ma jambar sian sada pansa  (pansa on khusus dipature di parmonding ni natua-tuaon ±2meter timbona). Najolo,  jambar on tata dope jala disi do huling-huling dohot imbuluna, digoari ma on Marpansa.   Molo hurang do sinadongan di hasuhuton (dang mampu), nang pe naung  marpahompu, ndang dibahen mangarapot/pangarapoton. Alai dipatupama partangiangan,  juhutna namarmiak-miak do. Dibagasan sadari do partangiangan dohot partuatna jala on  ma nanidokna mardalan nabolon.  

 Di ulaon partangiangan, mardalan do acara manjalo tumpak dohot mangalehon hata  pasugabe. Nuaeng on, tarlumobi na di kota, nang pe i namora, molo soadong be sipaimaon  ni suhut, paling lambat tolu ari nunga di boan tu udean. Pangarapoton dohot partuatna  dobagasan sadari digoari ma i, Marindahan Namasak.  

 Adong dua ragam marindahan namasak: – Molo hurang gabe, marpahompu, hurang  sinadongan di hasuhuton, dibahen ma pangarapoton, juhutna namarmiak-miak, digoari  ma partangiangan – Molo nunga gabe, marpahompu jala adong sinadongan, dibahen ma  pangarapoton jala parjuhutna lombu sitiosoara manang gaja toba (horbo). Molo horbo  parjuhutna, nunga ingkon adong pahompu sian anak baoa. Nuaengon nunga jolo  dibolgang (robus) sude parjambaran. Horbo ma parjuhut natumimbo dinamonding.  

Pangulahon ni pangarapoton sarupa do sude:  

1. Marsipanganon  

2. Manjalo tumpak  

3. Marhata sigabe-gabe  

4. Acara di alaman/acara partuatna  

5. Diboan ma tu udean